Zgjedhjet e para demokratike në Libi

Analistët thonë se rezultati përfundimtar nuk mund të parashikohet lehtë, për specifikën e këtyre zgjedhjeve apo dhe pjesëmarrjen e 3700 kandidatëve dhe mbi 100 partive politike.

Beteja kryesore është mes të moderuave, të përfaqësuar nga koalicioni i Xhibril, islamikëve, të përfaqësuar nga Partia e Drejtësisë dhe Rindertimit e “Vllazërisë Muslimane” dhe Al Vatanit, me në krye ish-kreun ushtarak Abdel Hakim Belhaxhi.

Procesi nisi vonë në disa qytete ku persona të armatosur u shfaqën në disa zona në lindje të Libisë, si Ras Lanuf, Brega dhe Axhidabija, ku një person u qëllua për vdekje në një qendër votimi. Por pavarësisht këtyre incidenteve, zyrtarët thanë se votimi u zhvillua në mbi 98% të qendrave të votimit të shtunën.

Shumë persona në lindje të Libisë janë të shqetësuar se zona e pasur me naftë do të ketë një përfaqësim të ulët, me 60 deputetë, ndërsa qytetet perëndimore 100 dhe ato në jug 40.

Presidenti i Shteteve të Bashkuara, Barak Obama i cilësoi këto zgjedhje një gur në themelin e tranzicionit libian drejt demokroacisë. Zyrtarët libianë thonë se rezultatet zyrtare do të publikohen më 11 korrik.

Pjesëmarrja në zgjedhje ishte rreth 60% ose 1.6 milione libianë votuan nga 2.9 milionë. Asambleja me 200 anëtarë do të zgjedhë qeverinë dhe kryeministrin.

Zgjedhjet e fundit parlamentare u zhvilluan fill pas pavarësisë së Libisë në 1952. Votimet e tjera në rang kombëtar u bënë në 1965, por u ndaluan partitë politike.

Top Channel