Kosovë, NATO: Do përmbushim misionin

Ka qenë kjo garancia që komandanti suprem i Aleancës për Evropën, James Stavridis i ka dhënë presidentes Atifete Jahjaga, gjatë një takimi të zhvilluar të mërkurën në Prishtinë.

Ndër të tjera, Stavridis e ka siguruar kryetaren e shtetit ballkanas, se nuk ka asnjë plan për reduktimin e pranisë së ushtarëve të KFOR-it, duke theksuar se ata do ta përmbushin deri në fund misionin.

Nga ana e saj, zonja Jahjaga ka dënuar sulmin e kryer të martën ndaj kampit të ushtarëve të KFOR-it në veri të vendit, nga i cili mbeti i plagosur një ushtarak.

Jahjaga ka theksuar se, vendosja e rendit dhe ligjit në veri mbetet sfida kryesore e institucioneve të Kosovës dhe ka shprehur mbështetjen e tyre ndaj misionit të NATO-s.

Dy granata dore u hodhën në kampin e trupave të KFOR-it mëngjesin e së martës nga banorë të komunitetit serb, në pikën kufitare të Bërnjakut.

Nga shpërthimi i një prej granatave një ushtar i KFOR-it humbi përkohësisht dëgjimin. Misioni i NATO-s reagoi ndaj ngjarjes, duke dënuar dhunën dhe duke premtuar luftimin “fuqishëm” të saj.

Ndërkohë, pika kufitare numër 31, siç njihet ndryshe pika e Bërnjakut, do të vazhdojë të mbetet e mbyllur deri në një urdhër të dytë.

Top Channel