Qeveria e Republikës së Kosovës dënon ashpër sulmin me granatë dore ndaj KFOR-it, që ndodhi të martën në mëngjes në vendkalimin kufitar në Bërnjak, si pasojë e të cilit u lëndua një ushtar i KFOR-it.
Ky sulm i radhës mbi forcat paqëruajtëse të KFOR-it, thuhet në deklaratën e qeverisë, që bëhet nga strukturat kriminale në veriun e Kosovës, është i dënueshëm nga të gjithë qytetarët e Republikës së Kosovës.
Qeveria e Republikës së Kosovës i jep mbështetje të plotë KFOR-it në përmbushjen e misionit të vet për sigurimin e lëvizjes së lirë edhe në atë pjesë të territorit të Kosovës.
Edhe njëherë, Qeveria e Republikës së Kosovës fton gjithë qytetarët serbë të Kosovës që të jenë pjesë e institucioneve demokratike kushtetuese të Republikës, vijohet më tej, si dhe të bashkëpunojnë me KFOR-in.
Qeveria i uron shërim sa më të shpejtë ushtarit të lënduar në këtë sulm, duke kërkuar që incidentet si ky të zbardhen menjëherë, mbyllet deklarata e qeverisë së Kosovës.
Top Channel
