Vende të caktuara të Bashkimit Evropian kanë pranuar në vitin 2011
kërkesat për azil të mbi 830 personave nga Kosova, të cilët kanë fituar
statusin e mbrojtjes deri në vendimin final.
Kështu thonë të dhënat e fundit të institutit evropian të statistikave, EUROSTAT, të cilave u referohet “REL” në edicionin e saj online.
Sipas të dhënave, gjatë vitit 2011 në Francë u është dhënë statusi i mbrojtjes 820 kosovarëve, ndërsa në Luksemburg 15 kosovarëve të tjerë.
Në tërësi, vitin e kaluar vende të ndryshme të Bashkimit Evropian kanë pranuar 84.100 kërkesa për azil, nga të cilat 14.400 janë bërë në Britaninë e Madhe, 13 mijë në Gjermani, nga 10 mijë në Suedi dhe Francë, etj.
Shumica e azilkërkuesve, sipas të dhënave të EUROSTAT, vijnë nga Afganistani, plot 13.300 persona, të ndjekur nga irakenët me 9 mijë dhe somalezët me 8.900 kërkesa për azil.
Një ditë më parë, ministri i Brendshëm kosovar, Bajram Rexhepi deklaroi se kërkesat e shumta për azil në vendet e BE-së mund të rrezikojnë liberalizimin e vizave mes vendeve të zonës Schengen dhe Kosovës.
“Armiku më i madh i liberalizimit do të jetë nëse edhe më tutje qytetarët e Kosovës do të keqpërdoren nga agjenci të ndryshme duke iu premtuar azil”, deklaroi Rexhepi.
Top Channel
