Ministrat e eurozonës, takim për Spanjën

Burime pranë BE-së deklarojnë se Madridi zyrtar mund të kërkojë zyrtarisht asistencë financiare për bankat e tij këtë fundjavë.

Deri tani Spanja ka mohuar zërat se ndodhet pranë një njoftimi të mundshëm për shpëtimin e institucioneve të saj bankare.

Fondi Monetar Ndërkombëtar vlerëson se bankave spanjolle u duhet një injektim në para të thata prej të paktën 40 miliardë eurosh.

FMN tha të premten se “testi i stresit” tregoi se sektori financiar iberik është menaxhuar mirë, por mbetet i cënueshëm.

Përgjigjia e konferencës së ministrave të Financave të eurozonës do të vijë më vonë gjatë ditës së shtunë, njofton më tej BBC.

Ndërkohë, në një intervistë për radion portugeze, nëndrejtori i Bankës Qendrore Evropiane, Vitor Constancio tha: “Pritet që Spanja të formulojë një kërkesë për ndihmë, ekskluzivisht për rikapitalizimin e bankave”.

“Duhet të tregohet hapur vullneti për të pasur një program të tillë për bankat spanjolle dhe kjo është mirë që të ndodhë shpejt”, ka shtuar Constancio.

Top Channel