Shtrenjtohet huamarrja për Spanjën

Ditën e enjte, vlera e letrave 10-vjeçare me vlerë u rrit në 6,04%, nga 5,74% që u shitën në prill, duke u afruar gjithmonë e më shumë me kufirin e rrezikshëm të 7%.

Besimi i investitorëve rreth ekonomisë spanjolle nuk është përmirësuar as pas deklaratave shpresëdhënëse të Madridit zyrtar, që deklaroi më parë gjatë javës se nuk do të jetë e nevojshme një hua madhore nga Bashkimi Europian dhe FMN për të tejkaluar krizën e rëndë të financave publike.

Sipas ekspertëve, shtrenjtimi në huamarrje për Spanjën nuk lidhet vetëm me arsye të brendshme, pasi ka edhe disa faktorë të rëndësishëm të jashtëm, siç ishte deklarata e autoriteteve kineze, që gjatë së enjtes informuan se do të reduktojnë investimet e tyre në Eurozonë, nga frika e shpërbërjes së monedhës së përbashkët euro.

Gjatë ditës, në një takim në Bruksel, Kancelarja e Gjermanisë, Angela Merkel, kërkoi një bashkim më të fortë politik midis vendeve të Europës, ndërsa kryeministri i Britanisë së Madhe, David Cameron, kërkoi që të merren masa të menjëhershme.

Ndërkohë, të enjten, pozitat e Eurozonës u goditën edhe më shumë nga zërat se një tjetër vend anëtar, Qipro, është pranë kërkimit të një huaje të madhe ndërkombëtare për shkak të rënimit të financave publike.

Top Channel