Misioni evropian për rendin dhe ligjin, EULEX, ka ritheksuar nevojën që
të sigurohet liri lëvizjeje pa kushte në veri të Kosovës, në mënyrë që
ai të implementojë detyrat e tij.
“Qëndrimi i EULEX-it është i pandryshuar. Nevojitet vendosja e qasjes së përhershme dhe pa kushte në veri të Kosovës, në mënyrë që të rifillojnë aktivitetet që kanë të bëjnë me sundimin e ligjit” ka deklaruar zëdhënësi i EULEX, Ane Blaksma për mediat serbe, raporton “RTK”.
Deklarata e tij vjen pas vendimit të të ashtuquajturit Shtabi për situata emergjente në veri të Mitrovicës, që u rekomandonte banorëve serbë që misionit evropian të mos i lejohet lëvizja në këtë zonë.
Javën e kaluar, banorë të komunitetit serb sulmuan me gurë dhe sende të tjera të forta një automjet të policisë së EULEX-it në Zubin Potok.
Automjeti policor u rrethua nga banorët serbë në qendër të qytetit, të cilët fillimisht e spërkatën me spraj dhe më pas e qëlluan me gurë.
Të gjendur në vështirësi, agjentët e misionit evropian njoftuan kolegët e Policisë së Kosovës. Për fat të mirë nuk pati agjentë të lënduar, por nga ana tjetër nuk pati as persona të arrestuar lidhur me këtë ngjarje.
Top Channel
