Kenia: BE-SHBA, sulmoni Somalinë!

Gjatë një konference zyrtare në Najrobi, ditën e martë, Raila Odinga foli për rëndësinë e pushtimit të qytetit port të Kismajos, baza kryesore e grupit islamist të al-Shabab.

Forcat keniane janë përfshirë në një betejë të armatosur me al-Shababin dhe sipas Odingës, trupat do të jenë në portat e bastionit të terroristëve në muajin gusht, por kryeministri theksoi se në mënyrë që të arrihet suksesi përfundimtar, Kenia ka nevojë për fonde dhe ndihma ushtarake.

Në deklaratën e tij, Odinga theksoi se “suksesi kundër al-Shabab mund të arrihet vetëm nëse ndërhyrja përshkallëzohet edhe me operacione nga deti e ajri, përveçse nga toka”.

Luftanijet e vendeve të Bashkimit Europian ndodhen në zonë për të luftuar forcat pirate, por sipas Kenias, tashmë ato duhet të përfshihen edhe në operacione luftimi kundër bazave të al-Shabab brenda vendit.

Najrobi zyrtar ka kërkuar asistencë në luftën me islamistët e lidhur me al-Kaedën edhe më parë, ndërsa Odinga shtoi se ka ndërmend t’i parashtrojë Uashingtonit një kërkesë zyrtare për të asistuar financiarisht dhe nëpërmjet bombardimeve të avionëve me telekomandë.

Top Channel