Autoritetet indoneziane deklarojnë se kanë gjetur avionin rus, që u rrëzua të mërkurën pasi u zhduk nga radarët, duke nënvizuar se nuk ka shenja për të mbijetuar.
Avioni tip “Sukhoi Superjet” u zhduk nga ekranet e radarëve 50 minuta pasi ishte ngritur në ajër nga Xhakarta, për një fluturim demonstrimi.
Rreth 50 persona ndodheshin në bordin e mjetit fluturues dhe skuadrat e shpëtimit i janë afruar zonës, kanë deklaruar autoritetet.
“Avioni u rrëzua në buzë të malit Salak. Kam folur personalisht me oficerin përgjegjës në terren, ai më tha se objekti është gjetur rreth 1.5 kilometra nga vendi ku u pa për herë të fundit në radar”, ka deklaruar presidenti indonezian Susilo Bambang Yudhyono.
Kryetari i shtetit ka nënvizuar se një hetim i detajuar duhet të nisë menjëherë, ndërkohë që operacionet e rekuperimit duhet të jenë prioritet.
Tetë pilotë e teknikë rusë, përfaqësues të linjës ajrore indoneziane dhe disa gazetarë ishin mes atyre që ndodheshin në avion.
Top Channel