Meksikë, masakër në shtetin e Sinaloas

Shkëmbimi i zjarrit u regjistrua në Guasave, në veri-perëndim të Sinaolas, një ndër shtetet meksikane më të prekura nga dhuna e lidhur me narkotrafikun.

Persona të armatosur, duke përdorur granata dhe armë automatike i zunë pritë patrullës ushtarake para se të tërhiqeshin në një hotel, pasi policia dhe ushtria mbërritën në vendin e ngjarjes.

Shkollat dhe bizneset në këtë shtet kanë mbetur të mbyllura pas luftimeve të ashpra që shpërthyen mëngjesin e së mërkurës, me orën lokale.

Forcat e sigurisë sekuestruan automjete dhe armë, përfshirë një pushkë të fuqisë së lartë, në gjendje të depërtonte automjetet e blinduara, ka bërë të ditur prokurori i shtetit të Sinaloas.

“Një operacion i forcave të rendit është në zhvillim e sipër për të rivendosur qetësinë dhe sigurinë në zonën e Guasaves”, deklaroi ndërkohë guvernatori i shtetit, Mario Lopez Valdez.

Ai hodhi poshtë deklaratat se autoritetet po humbasin kontrollin e sigurisë në Sinaloa, raportoi agjencia e lajmeve “EFE”.

Shteti në brigjet e Paqësorit është bastion i kartelit të fuqishëm të drogës me të njëjtin emër, të drejtuar nga trafikanti më i kërkuar në botë, Joaquin “El Chapo” Guzman.

Por pushteti i kartelit për kontrollin e rrugëve të trafikut të kokainës drejt Shteteve të Bashkuara po sfidohet nga grupe kriminale rivale, mes të cilave spikat Los Zetas.

Top Channel