Pavarësisht optimizmit, Serbisë duket se i ka dalë një pengesë e re në
rrugën e anëtarësimit në Bashkimin Evropian. Kjo, pasi Bullgaria i ka
vendosur një kusht asaj.
Zëvendëskryeministrja bullgare, Margarita Popova ka paralajmëruar Beogradin se nuk do të mund të afrohet me BE-në pa zgjidhur më parë çështjen e të drejtave të komunitetit bullgar në Serbi.
“Serbia do të bëhet anëtare e BE-së, por kjo nuk do të ndodhë pa u rregulluar problemet tuaja këtu”, deklaroi Popova gjatë një takimi me komunitetin bullgar në qytetin Bosilegrad të Serbisë.
Sipas raportimeve të “Indeksonline”, Popova gjatë takimit u ka premtuar bullgarëve të Serbisë se qeveria e saj do të përshpejtojë proçedurat për dhënien e shtetësisë bullgare për ta.
Serbia mori statusin e vendit kandidat pas arritjes së marrëveshjeve me Kosovën në Bruksel dhe që atëherë shprehet e bindur se së shpejti do të marrë datën për nisjen e negociatave të anëtarësimit.
Analistë të shumtë, kryesisht ata amerikanë, kanë paralajmëruar disa herë BE-në se një anëtarësim eventual i Serbisë pa njohur Kosovën do të bllokonte integrimin e kësaj të fundit.
Analistë si Daniel Server, apo edhe kongresmeni Eliot Engel kanë deklaruar se, me t’u bërë anëtare e bllokut, Serbia do të thotë: “Kosova mund të anëtarësohet në BE vetëm si pjesë e Serbisë”.
Top Channel