Anders Behring Breivik, i cili e ka pranuar autorësinë e masakrës së 22 korrikut të kaluar në Norvegji, ku mbetën të vrarë 77 persona, do të mbetet në burg deri në fillim të proçesit, i caktuar për më 16 prill.
Kështu ka vendosur gjyqtari Wenche Gjelsten, në një seancë në gjykatën e qarkut të Oslos, bëjnë të ditur agjencitë ndërkombëtare të lajmeve.
Nëse do të dënohet për terrorizëm, 32-vjecari rrezikon 21 vjet burg, por mund të transferohet në një qendër psikiatrie.
Nëse një gjë e tillë do të ndodhë, atëherë do t’u jepet të drejtë ekspertëve, sipas të cilëve, në momentin e masakrës i riu nuk ishte i aftë mendërisht.
Aktualisht po kryhet një kontroll i dytë mjekësor, por autori i masakrës refuzon të bashkëpunojë me mjekët. Breivik ka deklaruar në gjykatë se meriton medaljen e nderit për masakrën dhe ka kërkuar që të lirohet menjëherë.
Sapo ka hyrë në gjykatë, 32-vjeçari ka qeshur duke treguar duart e prangosura, një gjest ky i konsideruar nga avokati i tij Geir Lippestad si një lloj përshëndetjeje për ekstremistët e djathtë.
Autori i tragjedisë më të rëndë të ndodhur ndonjëherë në Norvegji më tej ka nisur të lexojë përmbajtjen e një letre të nxjerrë nga xhepi.
“Sulmi i korrikut donte të godiste tradhtarët që mbështesin emigracionin dhe promovojnë kolonizimin islamik të Norvegjisë”, ka deklaruar Breivik.
Top Channel
