Ekonomia, Obama paralajmëron Kongresin

Kuota e papunësisë ra në 8.3 për qind, duke mundur kështu parashikimet e analistëve, dhe duke pësuar një ulje nga 8.5 për qind që ishte në dhjetor.

Duke folur në një kazermë zjarrfikësish në Virxhinia, presidenti paralajmëroi Kongresin: “Mos e ngadalësoni rimëkëmbjen që ka filluar”.

Një raport i Departamentit të Punës tregonte se 243 mijë vende të reja pune janë krijuar në janar, shifra më e lartë në tre muajt e fundit.

Shifrat në fjalë përbëjnë një hap të rëndësishëm përpara për presidentin Obama, rizgjedhja e të cilit varet sidomos tek situata ekonomike.

“Tani, këto shifra do të rriten dhe ulen në muajt e ardhshëm dhe ekziston frika se ka ende shumë amerikanë që kanë nevojë për punë, ose për një punë që t’i paguajë më mirë nga ajo ku janë tani”, u shpreh Obama.

“Por ekonomia po rritet dhe po bëhet më efortë. Ripërtëritja e saj po shpejtohet dhe ne duhet të bëjmë gjithcka që kemi në dorë që ajo të vazhdojë kështu”, vijoi ai.

“Unë dua t’i drejtoj një mesazh të qartë Kongresit. Mos e ngadalësoni rimëkëmbjen që ka nisur, mos e prishni atë”, theksoi Obama.

Presidenti gjithashtu u bëri thirrje kongresmenëve republikanë që të kalojnë ligjin për zgjatjen e periudhës së heqjes së taksës mbi pagën për 160 milionë amerikanë brenda fundit të vitit.

Lidershipi republikan u informua për përmirësimin e situatës së tregut të punës, ndërkohë që deklaroi se mund të ishte bërë edhe më shumë për të përmirësuar gjendjen ekonomike të vendit.

Top Channel