Grupi i hacker-ave i vetëquajtur “Anonymous”, publikuan në internet një bisedë të realizuar ndërmjet FBI-së dhe autoriteteve britanike të luftës kundër krimeve kompjuterike, ku këta të fundit diskutojnë mbi bashkërendimin e punës për të luftuar piratërine online.
Biseda është realizuar nëpërmjet video-konference dhe mendohet se është kryer në muajin janar. “Anonymous” publikuan gjithashtu një e-mail, të vjedhur sipas shumë mundësive nga FBI ku ishin të gjitha adresat e postës elektronike të personave pjesëmarrës në video-konferencë.
FBI konfirmoi se video është realizuar mes saj dhe autoriteteve britanike dhe se është vënë në ndjekje të autorëve.
“Informacioni i shkëmbyer gjatë asaj video-konference ishte posacërisht për oficerët ligjorë dhe është përgjuar në mënyrë të paligjshme. Mbi ngjarjen në fjalë ka nisur një hetim për të vendosur para ligjit autorët e saj”, thuhet në një komunikatë të FBI-së.
Ndërkohë edhe njësia “E-Unit” në Londër, e specializuar për krimet kompjuterike deklaroi se për cështjen në fjalë ka nisur një hetim, por se nuk ka ende pista apo persona konkretë të dyshuar.
Top Channel
