Brazil, nxirren 6 të vdekur nga rrënojat

Autoritetet kanë deklaruar se ka pak gjasa që personat e tjerë të gjenden të gjallë nën rrënojat e ndërtesave shumëkatëshe të qytetit brazilian.

Autoritetet po hetojnë nëse ndërtimet ilegale kanë shkaktuar problemet e strukturave, që cuan në rrëzimin e ndërtesave ditën e mërkurë, njëra prej të cilave 20-katëshe.

Ndërtesat ishin ngritur pranë Teatrit Bashkiak dhe zyrave qendrore të gjigantit të naftës “Petrobras”. Disa dhjetëra punonjës të ndërhyrjes së shpejtë mbërritën në vendin e ngjarjes.

Pas saj, shqetësime të shumta janë ngritur lidhur me gjendjen e infrastrukturës në Rio, teksa i gjithë Brazili po bëhet gati të presë Kupën e Botës 2014 dhe Lojrat Olimpike dy vjet më vonë.

Sekretari për sigurinë dhe shërbimet publike në Rio, Carlos Osorio ka deklaruar se bashkia e qytetit ka marrë të gjitha masat për të ndihmuar skuadrat e shpëtimit.

Ndërsa Luiz Cosenza, një inspektor i policisë ndërtimore ka thënë për mediat lokale se dyshon që puna e dobët dhe ilegale është bërë shkak për rrëzimin e të paktën një prej ndërtesave.

Ndërsa korrespondenti i BBC, Hugh Oliver ka deklaruar se nuk duhet të habitemi nga shembja e ndërtesave, pasi pjesa dërrmuese e infrastrukturës së Rios është shumë e dobët.

“Infrastruktura është e dobët. Vetëm zona si Barra de Tihuka janë moderne dhe të mirëndërtuara, ndërsa pas lagjeve kryesore në qendër të Rios mbizotëron kaosi dhe siguria nuk është prioritet i autoriteteve”, ka deklaruar Oliver.

Top Channel