Një tërmet madhor mund të godasë kryeqytetin e Japonisë, Tokion, shumë shpejt, ishte përfundimi i një studimi shkencor.
Sipas grupit të ekspertëve, ka 75% mundësi që një tërmet me magnitudë më të fortë se shtatë sipas shkallës rihter, të godasë qytetin me 13 milionë banorë brenda katër viteve të ardhshme.
Një vlerësim i tillë bie në kundërshtim me vlerësimet e qeverisë, që e vendos mundësinë e rrezikut në 70%, në 30 vitet në vazhdim.
Ndonëse Japonia është vendi më i përgatitur në botë për t’u përballur me lëkundjet e tokës, një prej tërmeteve më të mëdha të historisë në janar 2011, i mori jetën më shumë se 20 mijë personave dhe krijoi një katastrofë bërthamore në Fukushima, pasi dallgë deri 20 metra të larta u formuan dhe depërtuan deri në thellësi të tokës.
Për herë të fundit, një tërmet madhor ka goditur kryeqytetin japonez në vitin 1923. Atëherë, lëkundjet e tokës me magnitudë 7,9 sipas shkallës rihter shkaktuan vdekjen e më shumë se 100 mijë personave dhe shndërruan qytetin në gërmadhë.
Specialistët e departamentit të sizmiologjisë në Universitetin e Tokios bazojnë përfundimet e tyre në shkallën në rritje të lëkundjeve të vogla që po ndodhin në zonë, shenjë e pakundërshtueshme sipas tyre, që një goditje e madhe është duke u krijuar.
Japonia është një vend veçanërisht i goditur nga lëkundjet e tokës, për shkak të pozitës së vet gjeografike. Ishujt japonezë janë të vendosur mbi bashkimin e tre pllakave të mëdha të Tokës, pikërisht në vendin ku ato përplasen vazhdimisht midis tyre.
Top Channel
