Forca policie pranë Podujevës

Sic raporton Kosovapress, rreth orës 8.00 të mëngjesit mbërriten në zonë edhe forca shtesë të Policisë së Kosovës, të cilën u vendosën përtej dy urave ku u mbajt protesta.

Pas vështirësive për qëndrim të protestuesve që u krijuan në të dy pikat kufitare, protesta te Dheu i Bardhë ka përfunduar të dielën pak para orës 23.00, kurse protestuesit afër pikës kufitare në Merdarë janë shpërndarë rreth orës 2.00 të mëngjesit të sotëm.

Vendimin për ndërprerjen e protestave e kanë marrë krerët e Lëvizjes Vetëvendosje, pasi policia bllokoi materialet logjistike në ndihmë të protestuesve.

Zyrtarë nga Lëvizja Vetëvendosje kanë thënë se për vazhdimin e protestës apo për veprime të tjera do ta njoftojnë opinionin me kohë.

Ndërpritet protesta në Merdarë

Në një test force dhe qëndrese, për shumë orë me radhë, 4 km larg pikës kufitare të Merdarës, u zhvillua protesta e lëvizjes Vetëvendosje “Serbia nuk kalon”, ashtu siç në fakt duhet të ishte mbajtur më 14 janar.

Kordoni i policisë në protestën e 22 janarit ishte krijuar pak km më tej, në udhëkryqin e Orllanit mes dy urave, ku për orë me radhë u ngujuan protestuesit e Vetëvendosjes me parrullat kundër qeverisë dhe për bashkim kombëtar.

Pas një udhëtimi ku makina e tij u kontrollua nga policia, kreu i lëvizjes Vetëvendosje Albin Kurti shpjegoi arsyet se përse pas shfuqizimit të mocionit për reciprocitet të plotë, VV po protestonte sërish.

Dheu i Bardhë, largohet Vetëvendosja në orët e vona

Pas më shumë se 9 orë e gjysmë të qëndrimit të tyre në afërsi të pikës kufitare të Dheut të Bardhë, protestuesit e lëvizjes Vetëvendosje kanë ndërprerë protestën e tyre. Ata thanë se do t’i bashkangjiten protestuesve të tjerë në Merdare.

Ka qenë Dardan Molliçaj nga Vetëvendosje që u ka dhënë këtë lajm protestuesve të mbetur që kishin sfiduar deri në orën 22.30 të së dielës temperaturat nën 0 gradë Celsius.

“Për shkak të kushteve të rënda logjistike “falë” Policisë së Kosovës, jemi të detyruar ta ndërpresim protestën. Do e vazhdojmë protestën në Merdare.”

Që nga ora 13.00 aktivistë dhe mbështetës të Vetëvendosjes bllokuan korsitë e rrugës duke kthyer mbrapsht dy makina me targa serbe.

Ndërsa asnjë maune me mallra serbe nuk erdhi deri tek protestuesit që ndodheshin 1 kilometër larg portës kufitare. Policia e Kosovës gjatë kësaj kohe kishte shtuar prezencën e saj dhe qëndronte pranë protestuesve, por gjithçka ishte e qetë dhe nuk u shënua ndonjë incident.

Top Channel