“Vepra me të cilën krenohet kryeministri Hashim Thaçi është ndërtuar edhe nga persona të kërkuar për krim të organizuar. Kamionët e kriminelit të shumëkërkuar Zvonko Veselinoviç kanë kontribuuar në ndërtimin e autostradës ‘Ibrahim Rugova”.
Kështu shkruan gazeta Koha Ditore në Prishtinë, në një artikull me titull “32 kamionët e Zvonko Veselinoviçit punuan në “Rrugën e Kombit”.
Këtë fakt e ka nxjerrë Prokuroria e Beogradit, e cila ka hapur hetimet mbi marrjen e jashtëligjshme të 32 kamionëve nga Zvonko Veselinoviç dhe dy persona të tjere.
Prokuroria serbe ka thënë për mediat se ka nisur hapja e hetimeve për marrjen në pronësi në mënyrë kriminale të 32 kamionëve, të cilët janë angazhuar në ndërtimin e autostradës së parë kosovare. Sipas prokurorit, përveç Veselinoviçëve, të dyshuar për këtë janë edhe Milan Radojncic dhe Dragan Curcic.
Zyrtarët e Qeverisë së Kosovës mohojnë të kenë njohuri për angazhimin e Zvonko Veselinoviçit me 32 kamionët në ndërtimin e autostradës.
“Kompania Bechtel & Enka është përgjegjëse për angazhimin e kompanive kontraktuese në ndërtimin e autostradës”, ka thënë Lah Nitaj, këshilltar i Ministrit të Infrastrukturës, Fehmi Mujota.
Top Channel
