Kronikë

Skllavëroi të bijën në Itali, në pranga babai monstër

11/12/2011 13:40

Një 12-vjeçare shqiptare u kthye në skllave nga babai i saj dhe jetoi e punoi në kushte çnjerëzore për muaj të tërë në Itali, ngjarje tronditëse e raportuar nga “Il Giornale” dhe të përditshme të tjera italiane.

Babai 37-vjeçar dhe nëna ekuadoriane, të përfunduar të dy në pranga për abuzim me të mitur, trajtonin prej vitesh vajzën e tyre si një kafshë pune, duke e detyruar të bënte të gjitha punët e shtëpisë, ndërsa e ushqenin me atë që mbetej nga tryeza e tyre dhe e linin të flinte përtokë.

E mitura, e cila kishte edhe dy vëllezër ndaj të cilëve rezervohej një trajtim krejtësisht normal, ishte e detyruar të lante të gjithë shtëpinë, pjatat, dyshemene, të gatuante dhe të bënte të gjithë detyrat e tjera, të cilat nëse nuk i realizonte me sukses, dënohej duke e nxjerrë nudo në tarracën e shtëpisë në mes të të ftohtit ose duke e mbyllur për orë të tëra në një dollap të errët.

Si pasojë e abuzimit të vazhdueshëm, siç bëjnë të ditur burimet policore, vajza nuk është në gjendje të flasë dhe as të shqiptojë emrin e saj. Në momentin e arrestimit, në qytetin e Rapalos, shqiptari, identetiti i të cilit nuk bëhet i ditur për momentin, u justifikua duke i thënë autoriteteve që e trajtonte ashtu të bijën pasi ajo ishte “shumë e djallëzuar”.

Arrestimi i babait “monstër” ndodhi pasi lajmërimit të fqinjëve, që kishin pikasur për të disatën herë vajzën e zhveshur në tarracën e shtëpisë dy-katëshe. Së bashku me gruan ekuadoriane, shqiptari ishte një punëtor sezonal, por me dokumentar të rregullta.

Top Channel