CEZ, borxhi 500 mln dollarë

Top Channel ka mësuar se borxhi i keq vetëm për kompaninë CEZ ka arritur në fund të tetorit 50 miliardë lekë, ose 500 milionë dollarë vetëm si detyrim, pa përfshirë kamatvonesat.

Kjo shifër është e barabartë me 5 për qind të prodhimit të përgjithshëm kombëtar, dhe nëse do të përfshihen edhe kamatvonesat për mospagimin e detyrimeve në kohë, ajo rritet edhe më shumë.

Shifra e borxhit të keq është rritur me ritme të larta gjatë dy viteve të fundit. Në dhjetor të vitit 2009 ajo ishte më e vogël se 20 miliardë lekë dhe në vetëm dy vjet është rritur me mbi 2.5 herë.

Drejtuesit e CEZ thonë se arsyet pse borxhi po rritet janë disa. Së pari, ato kanë të bëjnë me luftën ndaj humbjeve, ku atyre që vjedhin energji u ngarkohet një faturë deri në 4 mijë kilovat/orë, e cila e rrit borxhin.

Së dyti, është rritja e cmimit të energjisë, ku sasi të njëjta energjie të papaguar japin një borxh më të lartë për shkak të cmimit të rritur.

Por një tjetër arsye që u rrit ishte sipas CEZ amnistia e qeverisë për faturat e prapambetura, e cila krijoi në publik perceptimin e gabuar duke nxitur individët të mos paguajnë energjinë.

Por një arsye tjetër e rritjes së borxhit është se CEZ nuk ka arritur të përmirësojë dukshëm arkëtimet. Edhe pse mbi shifrat e arkëtimeve ka përplasje mes institucioneve të ndryshme, fakt është që norma e tyre mbetet e ulët.

Sipas raportit të  kompanise audituese Deloit, në vitin 2008 arkëtimet ishin 81.7 për qind, në 2009-ën ato ranë në 76.5% dhe në 2010-ën u rritën 81.9%.

Por Enti Rregullator jep të tjera shifra. Sipas Entit, arkëtimet vitin e kaluar ishin më të ulëta sesa pretendon CEZ, rreth 77.2 për qind dhe nëse nuk do të llogariteshin detyrimet e prapamebtura që shleu qeveria në gusht, ajo bie në 70.1 për qind.

Ndërkohë që këtë vit treguesi i arkëtimeve nga CEZ është edhe më i ulët. Sipas ERE-s, kjo do të thotë se kompania vazhdon të krijojë borxh të ri.

Aktualisht në Ministrinë e Financave po bëhet rakordimi i zinxhirit të borxheve në sektorin energjitik, ku CEZ, KESH dhe OST kanë krijuar një rrjet të ngatërruar detryimesh me njëra-tjetrën, ku përfshihen edhe institucionet buxhetore që i kanë borxh CEZ-it.

Nga ana e saj, kompania ceke e konsideron konfidenciale deklarimin e borxhit të keq, edhe pse kërkesa për rritjen e çmimit me 5 për qind bazohet pikërisht te kjo e dhënë.

Top Channel