Analistët: Zgjedhjet në PS… pa frymëzim

“Në Partinë Socialiste ka disa politikanë me stazh të vjetër më shumë se 20-vjecar, si Gramoz Ruci e Namik Dokle, të cilët kanë qenë vazhdimisht në kryesinë e Partisë Socialistë, kanë qenë eksponentë të rëndësishëm të Partisë Socialiste. Vjen një moment që njerëz të tillë që megjithë kontributin e pasionin e madh që kanë, është mirë të hapin rrugë, sepse ka një brez të ri që po pret. Stafeta duhet dorëzuar dhe ky ishte momenti i duhur”, thotë Nano.

Ndërsa Andi Bushati e shikon kryesinë e re nga një tjetër këndvështrim: “Fakti që kundërshtarë të afishuar të kryetarit të Partisë Socialiste, si Blushi apo Malaj, janë në kryesinë e PS-së, tregon se ka një vëmendje ndaj kritikave që janë bërë për mënyrën se si u drejtua për tre katër vite Partia Socialiste. Megjithë vërejtjet që ne mund të bëjmë, mënyra se si përfundoi ky kongres dhe si u krijua kjo kryesi tregon se keq apo mirë Partia Socialiste mbetet Partia më e hapur dhe më demokratike mes partive të tjera të spektrit të shoqërisë shqiptare”.

Për Mustafa Nanon kryesia e re është një strategji elektorale e Ramës.

“PS del nga gjithë kjo periudhë kongresuale më e fortë, më kompakte. Duhet një skuadër e mirë që në sytë e shqiptarëve të dalë me njerëz ekspertë, me njerëz që dinin si janë punët në këtë vend”, thotë Nano.

Lënia jashtë kryesisë e deputetëve Andis Harasani dhe Kastriot Islami për Andi Bushatin shihet deri diku, si një ngjarje që edhe mund të evitohej.

“Nëse do të kisha votuar si një socialist do të ishte një vlerë që brenda forumeve të Partisë Socialiste të ishin dhe Islami dhe Harasani. Por unë mendoj se edhe fakti që ata nuk janë nuk është, se kemi një vijë të qartë ndarëse, që zërat kundërshtarë të përjashtohen. Fakti që një pjesë e mirë e ish-LMN-së është prezente në drejtimin e Partisë Socialiste tregon se ka një vëmendje edhe ndaj kundërshtarëve të kryetarit në këtë parti”, thotë Bushati.

Më shumë se efikasiteti i strukturave, Andi Bushati thekson nevojën e një vëmëndje në ndërtimin e koalicioneve nga PS .

“Edhe në zgjedhjet e 2009, edhe në ato të 2011 po ta shohësh socialistët i kanë maksimalizuar votat që mund të marrin. Problemi i Partisë Socialiste nuk është si mundet të jetë efikase për të maksimalizuar votat e veta.Problemi i Partisë Socialiste është c’politika do të ndjekë, c’hapje progamore do të bëjë, c’aleanca do të bëjë në mënyrë që partia të rrisë koalicionin dhe jo për të përmirësuar strukturat e saj. Kjo është sfida reale”, tha Bushati.

Top Channel