Militantët kanë organizuar një sulm vetëvrasës me armë zjarri dhe bombë ndaj një kompanie private ndërtimi në qytetin perëndimor të Heratit, në Afganistan.
Sulmi filloi me një shpërthim në kompleksin e kompanisë, në një zonë pranë aeroportit të qytetit dhe më pas vijoi me armë zjarri.
Sipas raportimeve të mediave ndërkombëtare, forcat e sigurisë janë ende duke luftuar me militantët në kompleksin e kompanisë.
Burimet nënvizojnë se kompania në fjalë punon ngushtë me trupat e huaja për cështje logjistike.
“Në fillim shpërtheu një autobombë dhe më pas dy persona të armatosur u futën në ndërtesë”, ka deklaruar një zëdhënës lokal për agjencinë “AFP”.
Ngjarja, një mes shumë atentateve, ndodh në një moment kur trupat luftarake të NATO-s pritet të tërhiqen nga Afganistani në vitin 2014.
Sulmi më i rëndë i ditëve të fundit ishte ai kur një atentator vetëvrasës sulmoi një autobus me trupa të huaja në Kabul, duke vrarë 13 ushtarë amerikanë.
Në muajin korrik Aleanca ia dorëzoi kontrollin e sigurisë në Herat trupave afgane, veprim që pritet të bëhet edhe në qytete e provinca të tjera të vendit.
Ditën e mërkurë, presidenti Hamid Karzai deklaroi në një konference të mbajtur në Stamboll se vendi i tij nuk do të gjejë kurrë paqe pa patur një bashkëpunim rajonal kundër grupeve terroriste.
Ndërsa muajin e kaluar, prezenca e Shteteve të Bashkuara dhe trupat e NATO-s dhanë alarmin për rritjen gjithnjë e më shumë të pranisë së rrjetit terrorist Haqqani, në Afganistan.
Top Channel
