Kolumbi, vajza 10-vjecare fiton lirinë

Presidenti Juan Manuel Santos deklaroi se Nohora Valentina Munoz është liruar pas ndërmjetësimit të Komitetit Ndërkombëtar të Kryqit të Kuq.

Ende nuk është e qartë se kush e rrëmbeu vajzën teksa ajo shkonte në shkollë, në qytetin Fortul, në afërsi të kufirit me Venezuelën.

Megjithatë, dyshimet bien mbi rebelët e ekstremit të majtë që janë të pranishëm në rajon. Mijëra trupa ushtarake dhe policore u përfshinë në përpjekjet për ta shpëtuar atë.

“Le të festojmë për lirimin e Nohora Valentina. Një falenderim i vecantë shkon për Kryqin e Kuq”, deklaroi presidenti Santos. Detajet mbi mënyrën e negocimit dhe lirimit të saj nuk janë bërë ende publikë.

Nohora, e bija e kryetarit të bashkisë së Fortulit, u rrëmbye nga persona të armatosur më 29 shtator. Mamaja e saj u rrëmbye bashkë me të, por u lirua vetëm pak momente më vonë.

Ngjarja shkaktoi një indinjim të thellë në të gjithë Kolumbinë, ku u zhvilluan manifestime të mëdha për lirimin e 10-vjecares.

Top Channel