SHBA, shkatërrohet rrjeti i falsifikuesve

Mbi 86 persona janë arrestuar dhe 25 të tjerë po mbahen nën mbikëqyrje për pjesëmarrje në këtë aktivitet, që përfshinte pesë organizata kriminale në Nju Jork.

Prokurorët e cështjes kanë deklaruar se 13 milionë dollarë janë vjedhur nga personat e arrestuar në një hark kohor prej 16 muajsh.

Anëtarët e grupeve kriminale përdornin kartat e rreme për të blerë kryesisht produkte të “Apple” dhe të jetonin në mes të luksit.

“Këta persona nuk janë nga ata që të drejtojnë pistoletën, por dëmi ndaj viktimave është i njëjti”, ka deklaruar komisioneri i policisë, Raymond Kelly.

Sipas zyrtarit, hetimet 2-vjecare treguan se pesë organizatat me bazë në Nju Jork kishin lidhje me grupe të tjera kriminale në Afrikë, Evropë, Lindjen e Mesme dhe Azinë lindore.

“Deri më sot kjo është grabitja më e madhe dhe më e sofistikuar e të dhënave të kartave të kreditit që kemi parë ndonjëherë”, ka deklaruar prokurori i zonës së Kuinsit, Richard Brown.

Punonjës të bankave dhe restoranteve, në shërbim të bandave, vidhnin detajet e kartave të kreditit të klientëve duke përdorur një aparat të posacëm për të kopjuar të dhënat personale.

Këto të dhëna më pas u kaloheshin informaticienëve kriminelë, të cilët imitonin karta të American Express, Visa dhe llojeve të tjera.

Më pas, këto karta përdoreshin nga “grupi i blerësve” të cilët blinin produkte elektronike të teknologjisë së lartë, për t’ua shitur sindikatave kriminale në Kinë, Evropë dhe Lindjen e Mesme.

Top Channel