Mijëra protestues kanë marshuar në zonën financiare të Nju Jorkut, me tubime që janë mbajtur paralelisht edhe në qytete të tjera të Shteteve të Bashkuara.
Sindikatat e fuqishme u dhanë një nxitje të fortë demonstruesve që protestojnë prej kohësh, ndërkohë që anëtarët e tyre iu bashkuan marshimit në Manhatan.
Studentë nga kolegje të ndryshme të Shteteve të Bashkuara dolën nga klasat e mësimit dhe marshuan në shenjë solidariteti.
Aktivistët kanë shprehur indinjatën e tyre për ndihmat financiare që iu dhanë në vitin 2008 korporatave, ndaj papunësisë së lartë dhe humbjes së shtëpive.
Qindra demonstrues u arrestuan fundjavën e kaluar në Urën e Bruklinit. Të mërkurën, protesta me përmasa më të vogla u mbajtën edhe në Boston, Cikago, Los Anxhelos dhe San Francisco.
Evenimenti më i madh u mbajt në Nju Jork, ku rreth 5 mijë aktivistë bashkuan forcat me anëtarët e sindikatave dhe organizatat e komunitetit për të marshuar në Wall Street.
“Punëtorët tanë janë të entuziazmuar për këtë lëvizje. Vendi është kthyer përmbys. Ne po luftojmë për familjet dhe fëmijët”, deklaroi presidenti i Federatës së Bashkuar të Mësuesve, Michael Mulgrew.
Federata amerikane e Shtetit, Kontesë dhe Punonjësve Bashkiakë, Punëtorët amerikanë të Komunikacionit dhe organizata të tjera u bashkuan në marshimin e Nju Jorkut, ashtu sikurse bëri sindikata e infermiereve.
Protestat vijnë vetëm pak kohë pasi presidenti Obama prezantoi planin e tij për borxhin dhe ekonominë, që parashikonte ndër të tjera rritjen e taksave për të pasurit.
Situata e vështirë ekonomike që ka përfshirë Shtetet e Bashkuara ka bërë që politikanët që garojnë për presidencialet të sfidojnë presidentin.
Top Channel
