Gjermania: Pro zgjerimit të fondit të BE

Votimi ka siguruar një mazhorancë dërrmuese me 523 vota pro, edhe pse do të mjaftonin 511, 85 kundër dhe tre abstenim.

Orientimi i Bundestagut ishte një test thelbësor për lidershipin e kancelares Angela Merkel, për zgjedhjet e saj evropiane dhe për vetë qeverinë federale.

Merkel është përballur këto muaj me kundërshtimin e një pjese të opinionit publik dhe të elitës ekonomike e politike gjermane, të shqetësuar për krizën e borxheve dhe për kostot e shpëtimeve që sipas tyre mund të rëndojnë mbi Gjermaninë.

Komisioni Evropian e ka mirëpritur votimin e Berlinit, që konsiderohet si shtylla mbrojtëse e monedhës së përbashkët.

Brukseli është shprehur optimist se mundësia e zgjatjes së mandatit të Fondit Financiar Evropian të Stabilitetit do të votohet nga të gjitha vendet anëtare të eurozonës brenda gjysmës së parë të tetorit.

Reforma parashikon implementimin e kapaciteteve të fondit nga 250 në 440 miliardë euro, prezanton mundësinë e blerjes së titujve të shtetit evropian në tregun sekondar dhe vendosjen e linjave të kredive në dispozicion të vendeve në vështirësi.

Në bazë të marrëveshjes së arritur nga Këshilli i Evropës më 21 korrik, të gjithë parlamentet e 17 vendeve anëtare të eurozonës duhet të ratifikojnë marrjen e masave të reja.

Top Channel