11 Shtatori përmes fotografive

Sot ekspozita përmban foto nga 790 kontribues amatorë ose profesionistë, duke përfshirë kompozime të qarta fotografike, por edhe thjesht shkrepje të momenteve të histerisë. Sepse 11 shtatori 2001, është ngjarja më e fotografuar në histori.

Por për shkak të të drejtave të autorit mbi këto foto, kamerat e televizioneve nuk mund t’i filmojnë ato. Në këto kushte, ajo që merr rëndësi në një ceremoni të tillë, është mesazhi që përcillet nga fjalët.

“Në mes të asaj tragjedie bota u bë një sëbashku… Dhjetë vjet më pas miqtë tanë në Shqipëri dhe gjetkë qëndrojnë të patundur në mbështetjen e tyre, duke qëndruar përkrah kombit tonë dhe popullit amerikan në solidaritet. Dhe për këtë, ju jemi thellësisht mirënjohës” deklaroi ambasadori amerikan Aleksandër Arvizu.

Mirëpo mesazhet e politikanëve shqiptarë marrin një ngjyrim më kombëtar. Presidenti i Republikës Bamir Topi përmend luftën e përditshme kundër terrorizmit, por ndalet edhe te ekzekutimi publik i gjykatësit Konomi në Vlorë, si për të theksuar përgjegjësinë e strukturave qeveritare në zbardhjen e krimit.

“Një rast të tillë Shqipëria, populli shqiptar, sistemi gjyqësor, shteti shqiptar e ka ndeshur vetëm dy ditë më parë, ku një punonjës i nderuar i shtetit, i ligjit, mori goditjen në mënyrën më spektakolare barbare në mes të Vlorës. Kështu që ne duhet të punojmë cdo ditë së bashku në mënyrë që ta bëjmë botën më të qetë dhe më të paqtë”, u shpreh presidenti Topi.

Kurse kryeministri Sali Berisha thotë se asgjë nuk mund ta prekë më shumë njeriun e qytetëruar, sesa humbja e një jete të pafajshme. Mirëpo ai bën një lapsus të pavullnetshëm.

“Edhe unë, së bashku me familjet e viktimave, me qytetarët e lirë të vendit tuaj, me shqiptarët, i lutem Zotit që shpirtrat e viktimave të 11 janarit,… të 11… të 11 shtatorit, të gjejnë paqen e merituar”, tha kryeministri Berisha.      

Në vijim fjalën e merr ish-Presidenti Meidani, si President i Republikës së Shqipërisë në kohën e sulmit në Nju Jork. Gjatë kësaj kohë, kryetarja e Kuvendit, që nuk ishte parashikuar të fliste, thërret shefin e saj të protokollit, të cilit i kërkon që t’i thotë përkthyeses së ambasadorit Arvizu se dëshiron edhe ajo të thotë dy fjalë. Zonja Topalli dënon edhe ajo aktin e rëndë të 11 shtatorit, që bëri bashkë tërë botën.

Por ndonëse janë bashkë në përkujtimin e asaj dite, krerët më të lartë të vendit evitojnë shikimet dhe shtrëngimet e duarve. Mes tyre ndihet tensioni i marrëdhënieve të acaruara. Por tek e fundit, nëse në harkun e një ore, janë bashkë në ndasitë e tyre, kjo është meritë e amerikanëve dhe e 11 shtatorit 2001.

Top Channel