Ish-shefi i FMN-së, Dominique Strauss Kahn ka mbërritur në Paris nga Shtetet e Bashkuara.
Kahn dhe bashkëshortja e tij Anne Sinclair u ulën në aeroportin Charles de Gaulle në orën 07:05, në bordin e një fluturimi të Air France.
Ata ndodheshin në Nju Jork që nga arrestimi i tij në muajin maj, pas akuzave për dhunë seksuale, të cilat u rrëzuan muajin e kaluar.
62-vjecari, që dikur shihej si kandidati kryesor për postin e presidentit në Francë, i ka mohuar vazhdimisht akuzat ndaj tij.
Zotit Strauss Kahn, i cili dha dorëheqjen nga drejtimi i FMN-së disa ditë pas arrestimit, iu kthye pasaporta e tij javën e kaluar.
Kamarierja e hotelit, Nafissatou Diallo, që akuzoi Strauss Kahn se tentoi ta dhunonte atë në dhomën e hotelit, e ka spostuar cështjen e saj në një gjykatë civile.
Telashet nuk kanë mbaruar
Por ende nuk dihet nëse kthimi në Francë do të rikthejë paqen në jetën e Strauss Kahn, pasi autoritetet franceze kanë ngritur akuza të reja ndaj tij.
Ato janë ngritur pas denoncimit të një gazetareje dhe shkrimtareje të njohur franceze, e cila e akuzon ish-kreun e FMN se ka tentuar ta dhunojë gjatë një interviste.
Top Channel
