Një avion rus mallrash është rrëzuar në një zonë të largët lindore dhe
dyshohet që 11 personat që ndodheshin në bord të kenë vdekur.
Lajmin e bëjnë të ditur autoritetet lokale, sipas të cilave avioni i tipit “Antonov-12” u gjet në rajonin Magadan, pasi u zhduk nga radarët mëngjesin e sotëm.
Sipas një prokurori, ekuipazhi i avionit kishte raportuar se një nga katër motorët e tij kishte marrë flakë pak momente pas ngritjes në ajër.
I njëjti burim saktëson se 11 personat që ndodheshin në bord ishin 9 anëtarë të ekuipazhit dhe dy pasagjerë.
“Mbetjet e avionit u gjetën 200 kilometra nga fshati Omsukcan. Sipas informacioneve paraprake, 11 personat kanë humbur jetën nga përplasja”, ka deklaruar prokurori.
Përpjekjet e skuadrave të shpëtimit për të arritur në vendin e ngjarjes, në një pyll të dendur, janë vështirësuar nga prania e mjegullës.
Top Channel
