Parlamenti grek miraton ligjin anti-krizë

Në votimin nen për nen edhe deputetët e Demokracisë së Re kanë votuar “pro” në 22 nga 49 nene, të cilat u përkasin cështjeve të privatizimeve, të reduktimit të numrit të nënpunësve të aparatit shtetëror dhe të vlerësimit të pasurisë shtetërore. Një deputete e Pasok-ut ka votuar kundër dhjetë neneve që u përkasin privatizimeve.

Një zhvillim pozitiv për krizën greke cilësohet edhe marrëveshja e arritur orët e fundit nga bankat gjermane me Ministrinë e Financave në Berlin për pjesëmarrjen e tyre në planin e zgjatjes së kohës së pagesës së borxhit grek.

“155 vota = 120 miliard euro” shkruan  proqeveritarja “Ta Nea” që thekson se votimi i masave në parlament i jep një frymëmarrje vendit për një ndihmë të re nga BE.

Por pavarësisht se dy votimet e rëndësishme kanë kaluar në parlament, analistët theksojnë se nëse qeveria nuk do të mund të zbatojë këto masa deri në vjeshtën e ardhshme, me siguri që vendi do të shkojë në zgjedhje të parakohëshme.

Kohën më të madhe në seancën e së enjtes e kanë zënë diskutimet me akuza nga partitë opozitare për ngjarjet e dhunshme të ditës së mërkurë në sheshin Sintagma para parlamentit.

Në shtypin grek cilësohet gjithë aksioni i policisë si një “terrorizëm shtetëror i paparë”. “Policia keqmenaxhoi situatën dhe kjo i ka kushtuar shtetit 50 milion euro dëme”, shkruajnë disa gazeta opozitare që përmendin faktin e përdorimit pa shkak të mbi 30000 bombave tymuese, 8000 bombave me gaz lotsjellës dhe 10000 shisheve me lëndë kimike që u hodhën ndaj protestuesve.

Brigadave komunale të bashkisë u janë dashur orë të tëra për të pastruar qendrën e kryeqytetit që u kthye në 48 orët e fundit në një shesh-betejë.

Top Channel