Ambasadori Lamberto Zannier, nga Italia, u emërua sekretari i përgjithshëm i OSBE-së me një vendim të njëzëshëm të Këshillit Ministerial nga të 56 shtetet anëtare të organizatës.
Lajmin e bëri të ditur kryetari i radhës i OSBE-së, ministri lituan i Punëve të Jashtme, Audronius Ažubalis.
“Kam kënaqësinë t’ju njoftoj se, pas një shqyrtimi të kujdesshëm, unë dhe kolegët e mi, ministrat e Jashtëm të OSBE-së, përzgjodhëm Lamberto Zannier-in për të marrë timonin e kësaj organizate të rëndësishme”, tha Ažubalis.
Zannier, i cili është diplomat karriere, ka qenë drejtor i qendrës së OSBE-së për Parandalimin e Konflikteve në periudhën 2002-2006.
Që nga qershori i vitit 2008, ai ka shërbyer si përfaqësuesi special i sekretarit të përgjithshëm të OKB-së në Kosovë dhe kreu i Misionit të Përkohshëm Administrativ të OKB-së në Kosovë.
“Kam nderin të marr postin e sekretarit të përgjithshëm të kësaj organizate, të cilën e njoh aq mirë dhe e cila luan një rol kyç për promovimin e vlerave dhe luftimin e kërcënimeve të përbashkëta në fushën e sigurisë”, tha Zannier, i cili e merr detyrën më 1 korrik.
Top Channel
