Ushtarët izraelitë hapën zjarr ndaj protestuesve në pikat kufitare me territorin palestinez, Sirinë dhe Libanin.
Sipas raportimeve ende të pakonfirmuara, disa persona humbën jetën dhe dhjetëra të tjerë u plagosën. Në afërsi të Erezit, pikës së kalimit në Gaza, të paktën 45 persona u plagosën. Sot palestinezët po përkujtonin “Nakba-n” apo siç njihet ndryshe “Katastrofa”, kështu e quajnë ata themelimin e shtetit të Izraelit në vitin 1948.
Pas kësaj, qindra mijëra palestinezë u dëbuan nga shtëpitë e tyre. Në Ramallah të Bregut Perëndimor u raportuan përleshje në pikën e kalimit me Jeruzalemin Lindor. Protestuesit palestinezë kanë qëlluar me gurë ushtarët izraelitë të cilët përdorën gazin lotsjellës dhe plumbat e manovrës.
Ushtria izraelite thotë se ka përdorur të tillë plumba edhe në Lartësitë Golan, ndërsa protestuesit u përpoqën të kalonin kufirin.
Raportime të pakonfirmuara thanë se katër persona u vranë dhe 10 u plagosën.
Incidenti ndodhi në afërsi të fshatit Maxhdal Shams. Ushtria libaneze foli për 10 të plagosur në kufi me Izraelin.
Top Channel
