Pas katër ditësh pushimi rifilluan sot zbarkimet e emigrantëve në ishullin e Lampeduzës, lajmëroi rrjeti informativ “Mediaset”.
Një anije me 50 tunizianë pati nevojë për ndihmën e mjeteve të rojës bregdetare gjatë mëngjesit, por arriti të ankorohej në port pa probleme, pavarësisht një avarie.
Kjo anije u pasua nga të tjera, duke e çuar në 700 numrin e klandestinëve të zbarkuar sot, ndërsa shumë prej të saporardhurve janë femra shtatzanë apo prindër me fëmijë të vegjël.
Përpara kësaj dyndje, zbarkimi i fundit kishte ndodhur ditën e premte, kur 221 libianë mbërritën në Lampeduza në bordin e një peshkarexhe.
Ndërkohë, vazhdojnë takimet diplomatike në Bruksel për të zgjidhur problemin e lejeve të përkoheshme me të cilat Italia ka pajisur një pjesë të klandestinëve, dokumenta të cilat nuk njihen nga Franca pavarësisht marrëveshjes së lëvizjes së lirë mes shteteve.
Top Channel
