Me botën arabe “në flakë” dhe me revolta edhe në vende të tjera jashtë kësaj bote, prestigjiozja amerikane “Wall Street Journal” botoi në versionin e saj të printuar listën e regjimeve më të rrezikuar në botë.
Rendi nuk është i rastësishëm, pasi ai vjen sipas rrezikur të shembjes së regjimit. Siria renditet e para në këtë klasifikim, ndërsa Kina është shteti ku trazirat potenciale do t’i shkaktonin më pak kokëçarje autoriteve.
Siria – Revoltat kanë nisur tashmë. Edhe pse situata ekonomike nuk është aq katastrofike si në vendet e tjera arabe, manifestuesit janë lodhur nga pothuajse 50 vjet tirani dhe kërkojnë largimin e presidentit Bashar al-Assad.
Al-Assad beson se miqësia e tij me Iranin dhe mbështetja për çështjen palestineze do t’i sigurojnë popullaritetin e nevojshëm për të mbetur në pushtet, por duket se argumentime të tilla kanë humbur vlerë.
Bahrein – Një shtet i drejtuar nga një monarki kushtetuese, u detyrua të kërkonte ndihmën e Arabisë Saudite për të shtypur protestat. Megjithatë, pretendimet e popullsisë nuk mund të kënaqen. Ato nuk janë ekonomike, por fetare. Shumica shiite e popullsisë kërkon vetëm largimin e mbretit sunit.
Jemen – Të premten e shkuar, një protestë përfundoi me një masakër masive, ku 52 persona humbën jetën. Protestat e mëparshme kishin përfunduar në viktima, por shkalla e mizorisë së treguar nga forcat e regjimit tregoi se sa po lëkunden pozitat e presidentit Saleh.
Arabia Saudite – Vendi drejtohet nga një monarki absolute dhe ka njohur disa protesta sporadike. Regjimi është treguar i suksesshëm në parandalimin e protestave të brendshme, por Irani luan një rol aktiv në ngritjen e minoritetit shiit për të destabilizuar vendin më të madh eksportues të naftës në botë.
Marok – Në Marok po “farkëtohet” një lëvizje anti-qeveritare dhe pikërisht për të shmangur më të keqen, mbreti ka premtuar një seri reformash. Megjithatë, durimi i popullsisë ka arritur kulmin, ndërsa investimet nuk mund të rriten drastikisht.
Jordani – Jordania, ashtu si Arabia Saudite, i ka dalë mbanë frenimit të protestave të brendshme, por mbreti ka pranuar të ulet në tavolinë me opozitën për të shqyrtuar mundësinë e reformave kushtetuese. Stabiliteti i vendit do të varet shumë nga se kush do të dalë fitues midis ndikimit amerikan dhe lëvizjeve talebane.
Vietnam – Shteti komunist ka vuajtur së fundmi një rënie të dukshme të ekonomisë dhe rritje të papunësisë. Siç ka treguar përvoja në vendet komuniste, dështimi apo suksesi i regjimit varet pikërisht nga mirëqënia ekonomike.
Venezuelë – Republika autoritare e Hugo Chavez, shtyp prej kohësh liritë dhe të drejtat demokratike të njeriut. Ndonëse Chavez vazhdon të jetë shumë popullorë midis klasës së ulët në vend, një opozitë gjithmonë më e fortë elitare po formohet kundër tij.
Kinë – Pavarësisht rritjes astronomike ekonomike, papunësia në zonat rurale është veçanërisht e lartë. Megjithatë, duket e vështirë që një shkëndijë të provokojë një kaos, kjo sepse Pekini zyrtar po përmirëson politikat e tij të ndihmës sociale, në të njëjtën kohë që gëzon edhe mbështetjen e një prej shërbimeve sekrete më të efektshëm në botë.
Top Channel
