Pesë persona të arrestuar në Francë si pjesë e një hetimi për një sulm
terrorist ndaj një dyqani hebrenjsh në Paris janë liruar, kanë njoftuar
prokurorët lokalë.
Të paktën 12 persona u arrestuan në fundjavë dhe policia deklaroi se kishte të bënte me “një rrjet terrorist jashtëzakonisht të rrezikshëm”.
Ndërkohë, 7 personat e tjerë pritet të shfaqen në gjykatë. Materiale për përgatitjen e bombave u gjetën në një garazh në lagjen periferike Torsi të Parisit natën e së martës.
Ky zbulim erdhi pas një sulmi me grantatë ndaj një dyqani ushqimesh në periferinë tjetër Sarasel, më 19 shtator, ku një person mbeti i plagosur.
Një person i dyshuar për organizimin e sulmit, 33-vjeçari Jeremie Louis Sidney, u qëllua për vdekje në shtëpinë e tij në Strasburg ditën e shtunë, në një shkëmbim zjarri me policinë.
I dënuar me burg më parë për trafik droge, kohët e fundit ai ishte konvertuar në Islam. Videot e sekuestruara në apartamentin e tij e tregojnë 33-vjeçarin duke folur për sulmet e 11 shtatorit 2001 në Nju Jork, si dhe duke theksuar se këto sulme ishin vetëm fillimi.
Prokurorët e përshkruan atë si “një kriminel” dhe thanë se gjurmët e gishtave të tij ishin gjetur në copat e mbetura të granatës së hedhur në dyqanin në lagjen hebreje të Parisit.
Top Channel
