Gjuetarët e thesarit

“Dikush tjetër gjuan peshk, dikush zogj, dikush del për gjueti në pyll, ndërsa unë kam pasion kërkimin e thesareve”, shprehet Shtator Advolli. Ai është një nga ata që rëndom thuhet se kanë lindur me shpirtin e aventurës. I ka pasur gjithnjë pasion gjërat me vlerë. Gjetja e thesareve për të është edhe mënyrë për të fituar por dhe për t’u argëtuar.

Ndërsa për Ramadan Lilollin, pasioni për kërkimin e thesareve lind nga një peng i rinisë së tij. Në vitin 1976 ka marrë pjesë në zbulimin e disa furrave djegieje të cilat u mbyllën me një urdhër enigmatik. Që atëherë dyshimi se mund të ketë pasur flori, ka mbetur për të si një ëndërr në sirtar të cilën 60-vjecari mendon ta zbulojë shumë shpejt. Deri më tani janë gojëdhënat dhe infomacionet e herëpashershme që e bëjnë të dalë për gjueti thesarësh. Në bashkërendim me metalzbuluesin, suksesi është i padiskutueshëm nëse mëson t’i përdorësh sic duhet.

Ndryshe nga gjuetitë e tjera, gjuajtja e thesarit s’është triumf që mund të ndahet me të tjerë. Askush s’tregon për rezultatet. “Gjarpri s’i tregon këmbët e veta”, pohon Gjergji. Ethet e thesarit gjithsesi ndonjëherë bëhen dhe të rrezikshme, vecanërisht për ata që kërkimin e kthejnë qëllim në vetvete. “Ka nga ata që kanë humbur qetësinë dhe kanë falimentuar”, shton Berti.

Por si ndahet thesari? Në Kodin e Procedurës Civile, shpjegohet qartë se thesar i përket pronarit të tokës ku gjendet thesari, dhe se personi që e zbulon ka të drejtën e një shpërblimi të aryeshëm që nuk duhet të kalojë gjysmën e vlerës së tij. Por a e dini se edhe Ali Pasha, ka qenë një gjuetar thesari? Studiuesi i tij, Sabri Godo rrëfen se dhe vetë pashai ka qenë i apasionuar pas kërkimit të thesareve, madje ai kishte punësuar një arkeolog holandez për të shuar kureshtjen e tij.

Ndërkohë si për ironi të fatit, një nga thesaret më të lakuara në media kohët e fundit është pikërisht thesari i Ali Pashes. Një ekspeditë ka nisur kërkimet në Greqi për të gjetur pasurinë që pretendohet se arrin 30 ton ar dhe bizhuteri. Po ku mund të jetë thesari i Ali Pashës? Për Godon, përgjigja duhet gjetur në Tepelenë. Një informacion që me siguri nuk do t’u shpëtojë gjuetarëve të thesarëve që në Shqipëri e kanë kaluar numrin 200.

Top Channel