Shqipëria renditet ndër 100 vendet më të mira në botë në klasifikimin që revista e përjavshme amerikane “Newsweek” ka bërë.
“Ndonëse rrallë është gjendur në artikujt kryesorë të gazetave dhe duket një model i pamundur për vendet e tjera, kjo demokraci e re, në fakt, po tejkalon të gjitha vendet e tjera me të ardhura të ulëta”, shkruan revista amerikane.
Klasifikimi është bërë mbi pesë kritere, ndër të cilat niveli i edukimit, shëndetësisë, cilësia e jetës, dinamizmi ekonomik dhe ambienti politik. Në renditjen e përgjithshme të klasifikimit: “Vendet më të mira të botës”, për herë të parë në historinë e saj, Shqipëria renditet e 57-a, me 62,56 pikë, në renditjen e 200 vendeve të testuara. Sipas revistës amerikane “Newsweek”, Shqipëria merr çmim nderi për sistemin e arsimit. “Në Shqipëri, gati 99 për qind e shqiptarëve janë të arsimuar”, shkruan “Newsweek”.
Në mesin e vendeve në kategorinë e saj me të ardhura të ulëta, ajo vazhdimisht renditet më e lartë në arsim, shëndetësi, si dhe cilësinë e jetës. Shqipëria në edukim ndodhet në vendin e 50 me 81.02 pikë, në shëndetësi e 52-a me 71.02 pikë, për cilësinë e jetesës renditet e 53-a me 67.92 pikë, për dinamizmin ekonomik klasifikohet në vend të 81-të me 34.09 pikë dhe për mjedisin politik renditet në vendin e 56-të, me 58.7 pikë.
Top Channel
