“3%-shi Argitës ishte ryshfet”

Pas intervistës së biznesmenit pakistanez në Top Channel, reaguan si zonja Argita Berisha Malltezi, e deri Kryeministri Berisha i cili në mbledhjen e grupit parlamentar të PD-së citohet të ketë deklaruar se kërkesat e Ansar, s’mund të realizoheshin nga ana ligjore, pasi ai kërkoi një investim ekskluziv, naftë pa TVSH dhe tokë private në kuadër të nismës ‘Shqipëria 1 Euro’.

Në reagimin e datës 19 Janar 2013, Argita Berisha – Malltezi deklaroi se Zafarit çdo tarifë i është ofruar në përputhje me ligjet e vendit dhe që prapë, në kundërshtim me detyrimet, ai nuk ka paguar asnjë qindarkë për shërbimet e ligjshme që ka përfituar. Ndërsa Selami Xhepa, ish-këshilltar i kryeministrit, më 21 Janar botoi një shkrim me titull “Historia ime me biznesmenin Ansar”.

Por cili është qëndrimi zotit Ansar pas këtyre deklarimeve. Biznesmeni pakistanez është përgjigjur në një intervistë të dytë për Top Channel, dhënë gazetarit Muhamed Veliu.

Muhamed Veliu: Zoti Ansar, qëllimi i kësaj interviste është për të sqaruar disa çështje që lindën pas intervistës tuaj të parë më 15 Janar, lidhur me disa deklarime nga kryeministri Berisha, Argita Malltezi dhe ish-këshllitari i kryeministrit Selami Xhepa. Do të doja ta nisja këtë intetervistë duke ju drejtuar këtë pyetje. A i keni kërkuar Argita Malltezit që në emrin tuaj të ndermerrte ndonjë veprim konkret, pasi ajo ka deklaruar se ju nuk e keni paguar për punën që ka bërë? Cili është shpjegimi  juaj për këtë?

Zafar Ansar: Gjatë takimit i tregova Argitës se do të më duheshin shërbimet e saj ligjore për t’u marrë me të gjitha kërkesat ligjore. Ajo ra dakort dhe më dërgoi tarifat për shërbimet e saj, që siç e dini përfshinte edhe tarifën e suksesit prej 3%. Unë nuk e kam firmosur marrëveshjen. Argita më ka dërguar një faturë për punën e saj në një copë letër, ku nuk ishte shkruar numri i regjistrimit të saj, data, kodi taksave apo TVHSH-ja. Kjo lidhej me punën e saj për periudhën 20 Gusht-30 Shtator. Shuma që më faturohej ishte për 42,5 orë punë pa dhënë asnjë detaj për punën e bërë dhe pa dokumenta shoqëruese. I kam kërkuar të më dërgonte të gjitha dokumentat për të vërtetuar punën e bërë. Nuk kam marrë asnjë përgjigje prej saj prandaj edhe faturën nuk e kam paguar. Mund t’ju vë në dispozicion faturën e dërguar prej saj.

Muhamed Veliu: A keni ndonjë ide se ku ndodhej toka të cilën Argita ju ofroi për ta blerë?

Zafar Ansar: Më ishte treguar se toka ndodhej në Porto Romano të Durrësit. Unë kurrë s’kam qenë në Durrës dhe nuk e di se ku ndodhet.

Muhamed Veliu: Opozita shqiptare thotë se toka që ju ofrua ta blenit  është pronë e biznesmenit Damir Fazlliç. A ju tregoi Argita kur e takuat apo në korrespondencën mes postës elektronike, se cil ishte pronari i tokës?

Zafar Ansar: Nuk e di se cili është pronari i tokës dhe nuk më është përmendur asnjë emër.

Muhamed Veliu: Gjatë mbledhjes të grupit parlamentar të PD-së, kryeministri citohet të ketë deklaruar se kërkesat tuaja në bazë të legjislacionit shqiptar s’mund të realizoheshin pasi keni kërkuar një investim ekskluziv në këtë fushë, naftë pa TVSH dhe tokë private në kuadër të nismës “Shqipëria një Euro”. A i keni drejtuar kryeministrit apo këshilltarëve të tij këto kërkesa?

Zafar Ansar: Kujtesa ime për takimin tonë është krejt ndryshe. Arsyeja përse doja të takoja kryeministrin ishte thjesht për ta informuar rreth propozimit tim që lidhej me ndërtimin e një TEC-i në Shqipëri dhe për të marrë bekimin e tij për ta bërë një gjë të tillë. Kryeministri pati mirësinë të binte dakort dhe më tha të ecja përpara me projektin. Unë nuk i kam kërkuar kryeministrit asgjë ekskluzive apo tokë falas. Ne në ofertën tonë parashikonim se na duhej 45,000  metra katrorë tokë me vlerë 2,2500,00 euro. Oferta që ne i propozuam KESH nuk përfshinte TVSH-në apo ndonjë taksë tjetër për TEC-in 144 mega. Kjo është një praktikë ndërkombëtare që të mos përfshihen taksat sepse ti nuk mund të parashikosh ndryshimin e taksave në të ardhmen.

Muhamed Veliu: A i keni lexuar komentet e shkruara nga Selami Xhepa, ish-këshilltar i kryeministrit dhe çfarë mund të na thoni për atë që thotë zoti Xhepa?

Zafar Ansar: Me keqardhje dua t’ju them se artikulli i shkruar nga ish-këshilltari kryeministrit Berisha, Selami Xhepa, me titull “Historia ime me biznesmenin Ansar” në gazetën Panorama, është i mbushur me një sërë gjërash. E ndërsa kryeministri pretendon se projekti im u bllokua nga kërkesat e mija ekskluzive, ish-këshilltari i tij, zoti Xhepa, pretendon se “Politika e qeverisë ishte të dekurajonte TEC-et që do të punonin me naftë dhe kjo ishte arsyeja përse projekti u bllokua”. Cili ka të drejtë? Kryeministri apo këshilltari? E refuzoi kryeministri ofertën e projektit për çështje ekskluziviteti apo për çështjen e naftës? Në të tilla kushte nuk kishte arsye përse unë të vazhdoja dhe të dërgohesha në zyrën e vajzës së kryeministrit. Kam një tjetër pyetje. Përse KESH-i nuk e refuzoi ofertën? Zoti Selami Xhepa thotë se unë vij nga një vend ku përmes pagesave korruptive blen gjithçka duke hequr çdo pengesë.  Uroj shumë të kisha rënë dakort ndaj kërkesave që mu bënë dhe kështu nuk do të kisha patur asnjë pengesë. Unë nuk veprova kështu, prandaj edhe projekti nuk gjeti rrugën e zbatimit. Dua t’i them zotit Xhepa se unë nuk e njihja se kush ishte vajza e kryeministrit. Atë ma prezantoi ambasadori Admir Banaj, një njeri i besuar i kryeministrit. Argita më ofroi shërbimet e saja dhe unë rash dakord të bashkëpunoja me të. Ajo më dërgoi marrveshjen për të siguruar pagesat e saja për shërbimet ligjore, përveç të cilave, kërkonte edhe 3% si tarifë suksesi. Unë nuk e nënshkrova këtë marrëveshje pasi e konsiderova si ryshfet. Projekti im u arkivua jo nga kërkesat ekskluzive, apo çështje të naftës, por sepse nuk pranova kërkesat. Kompanitë e mija operojnë në shumë vende, përfshirë Suedinë ku etika ligjore është më perfektja në botë. Këshilltari kryeministrit, Selami Xhepa, duke iu referuar origjinës time nga Pakistani  thotë se: “me ryshfet unë mund të arrij çdo gjë”. Por zoti Xhepa duhet ta dijë se transaprenca dhe ryshfeti trajtohen me shumë seriozitet në Pakistan. Në më pak se një vit Gjykata Supreme e Pakistanit shkarkoi kryeministrin në detyrë për faktin se gënjeu drejtësinë. Ndërsa këtë muaj, kryeministri tjetër në Pakistan u gjet fajtor nga gjykata pas akuzave për korrupsion dhe Gjykata Supreme ka lëshuar një urdhër-arresti ndaj tij. Shpresoj që edhe gjykatat shqiptare do të ndjekin Pakistanin si shembull për të luftuar korrupsionin që vjen nga zyrat e nivelit të lartë. Askush nuk mund të jetë mbi ligjin.

Muhamed Veliu: Zoti Ansar, e përshkruat kërkersën e zonjës Berisha për tarifën e suksesit prej 3% si ryshfet. Ju zhvilloni biznesin tuaj në disa vende të botës. A jeni vënë ndonjëherë përballë kësaj lloj kërkese nga kompanitë ligjore që keni bashkëpunuar?

Zafar Ansar: Kur ju shkoni në një kompani ligjore, ato ju faturojnë për shërbimet ligjore që ofrojnë. Por kjo kërkesë ishte diçka e re për mua. Nuk e di se për cfarë ishte ky 3 përqindësh. S’kam anjë ide. Unë bashkëpunoj me zyra ligjore çdo ditë. Vajza ime punon në një prej kompanive më të mëdha ligjore në botë, e quajtur Little Chance. Ajo më tha se kurrë nuk e kishte dëgjuar diçka të tillë.

Muhamed Veliu: Pas intervistës tuaj të parë në 15 Janar 2013 ka lindur një pyetje: cili është motivimi juaj të flisni tani për një çështje e cila ka ndodhur në vitin 2007?

Zafar Ansar: Gjatë gjithë kësaj kohe kam dashur mos të përfshihem në politikën e brendshme të Shqipërisë pasi nuk kam asnjë interes sot dhe as që kam për të patur në të ardhmen. Me keqardhje dua t’ju them se nuk kisha zgjidhje tjetër por t’i përgjigjesha artikullit shpifës të zotit Xhepa.

Deklaratat e Ansar, reagon Ruli
Ish-ministri i METE: Deklarata absurde, propozimi pa leverdi

Lidhur me deklaratat e bëra nga Zafar Ansar dhe lajmet e publikuara në disa të përditshme, ka reaguar ish-ministri i Ekonomisë, Genc Ruli, i cili ka sqaruar se projekti i biznesmenit pakistanez u refuzua për arsye se nuk ishte i leverdisshëm.

Përmes një njoftimi për shtyp, zoti Ruli ka dhënë variantin e tij të ngjarjes, duke thënë se, biznesmeni kishte parashtruar një seri kushtesh ekskluziviteti, që sipas tij dëmtonin shtetin shqiptar.

“Ministria e Ekonomisë, Tregtisë dhe Energjetikës që unë drejtoja, si dhe Korporata Elektroenergjetike Shqiptare, pasi janë njohur dhe kanë shqyrtuar propozimin dhe jo projektin e paraqitur nga Zafar Ansar, janë prononcuar në mënyrë të qartë në atë kohë, duke e konsideruar të paleverdisshëm dhe aspak në dobi të shtetit shqiptar, për shkak të kushteve të ekskluzivitetit që Ansar kërkonte të vendoste, si dhe çmimeve të disfavorshme që ai pretendonte”, thotë Ruli në reagimin e tij.

“Kjo, dhe vetëm kjo, ka qenë arsyeja e refuzimit të projektit. Ishin këto kushte që vendoste Ansar, që e bënin këtë propozim të tijin ndër më të paleverdisshmit dhe më të papranueshmit që kanë mbërritur në adresën tonë. Çdo arsye tjetër e servirur këto kohë është thjesht spekulim i qëllimshëm dhe dashakeq”, vijon ish-ministri i METE.

Deklaratat që bën sot biznesmeni në fjalë, Ruli i cilëson absurde dhe të pavërteta. “E vetmja gjë që vjen në mendje, që mund të ketë shtyrë zotin Ansar për t’i nxjerrë ato fjalë nga goja, është kthimi i “borxhit” ndaj atyre që e bënë konsull nderi para vitit 2005”, thotë më tej Ruli. 

Top Channel