Dosja “Partizani”/ Taulant Balla paraqitet në SPAK, pas tre orëve dëshmi: Nesër padi penale kundër Berishës

07/06/2023 09:44

Kreu i Grupit Parlamentar të PS-së, Taulant Balla ndodhet në SPAK këtë të mërkurë.

“Kam qenë shpesh në këtë institucion për të depozituar kallëzime penale si person që kam dijeni. Kam akuzuar persona me pushtet edhe kur kam qenë në opozitë edhe tashmë kur jam në pozicionin e Kryetarit të Grupit Parlamentar të Partisë Socialiste dhe besoj e shpresoj që Prokuroria Speciale Antikorrupsion do t`i shkojë deri në fund të gjitha akuzave, si ajo për privatizimin e Kompleksit Sportiv Partizani ku besoj se kjo do të shkojë deri në fund. Kam bërë kallëzim edhe për privatizmin e kompanisë OSSH pas hetimit parlamentar dhe kam bindjen që edhe nesër do të jem këtu për një padi që kam bërë ndaj shtetasit Sali Berisha për deklarimet e tij dhe besoj se ky standard duhet vendosur nga të gjithë ne politikanët. Në momentin që ndaj teje ngrihet një akuzë duhet që ta çosh qoftë në SPAK qoftë në GJKKO për ta adresuar këtë çështje. Dua t`i qëndroj angazhimit përpara prokurorëve se çështjet për të cilat diskutova sot të mbeten pjesë e sekretit hetimor me shpresën se do i shkohet deri në fund. Unë jam thirrur sot si një person i cili ka dijeni dhe natyrshëm që kam dhënë shpjegimet e mia për çështjen. Një prej rasteve tipike të korrupsionit në vend, pra të përdorimit të detyrës shtetërore nga ana e vjerrit në dobi të dhëndrit duhet të marrë fund”, tha Balla.

Taulant Balla ka akuzuar ish kryeministrin Sali Berisha për privatizimin e truallit në kompleksin “Partizani”.

Top Channel