Hetim, kush punoi me dosjet e UÇK në Shqipëri/ Kuvendi miraton ngritjen e Komisionit të Posaçëm, e drejton Ulsi Manja

03/12/2020 11:49

Parlamenti miratoi sot përbërjen e Komisionit të Posaçëm parlamentar që do të hedhë dritë për të gjitha veprimet që lidhen me hetimet e kryera në territorin shqiptarë për llogari të krimeve të supozuara të UÇK-s.

Gazetari i Top Channel Muhamed Veliu mëson se ky komision pritet të drejtohet nga socialisti, Ulsi Manja dhe në përbërje do të ketë edhe deputetë të opozitës.

Nga shumica mësohet se anëtarë do të jenë deputetët Ulsi Manja, Alket Hyseni, Klotilda Bushka, Adnor Shameti dhe Ermonela Felaj. Ndërsa nga opozita do të marrin pjesë në Komision Myslim Murrizi, Edmond Stojku, Enver Roshi dhe deputetja e pavarur Elena Xhina.

Komisioni i Posaçëm pritet të merret me administrimin e  dokumentacionit dhe hartimin e  një raporti përmbledhës dhe informues mbi gjetjet dhe konkluzionet që kanë nxjerrë verifikimet e kryera nga institucionet përkatëse në Shqipëri mbi çështjet e raportit të Dick Marty-t, nëpërmjet veprimeve apo mosveprimeve në ndihmë të ashtuquajturës veprimtari kriminale e drejtuesve të UÇK-s në territorin e republikës të Shqipërisë.

Top Channel ka mësuar se menjëherë pas ngritjes të këtij komisioni, do të kërkohet një dosje me 6 fashikujt hartuar nga Prokuroria e Përgjithshme e kaluar EULEX në Kosovë në Qershor të vitin 2014.

Kjo dosje është hartuar  në kuadër të procedimit penal në Hagë për të ashtuquajturin Grupi Drenicës, ku bënte pjesë Ramush Haradinaj, Fatmir Limaj dhe disa luftëtarë të tjerë të UÇK.

Në përfundim të punës Komisioni i posaçëm parlamentar duhet të paraqesë një raport e hartojë një projekt rezolutë për parlamentin.

Top Channel