Gjatë gjithë këtyre ditëve pas tërmetit të 26 nëntorit, duket se fëmijët vazhdojnë që të kenë përjetime nga më të ndryshmet në varësi të mënyrës se si ata e kuptojnë këtë fenomen. Shumica prej tyre frikën dhe emocionet i shprehin përmes vizatimeve ku tregojnë shtëpitë apo pallatet se si kanë rënë, punonjësit e zjarrfikësve që i shpëtojnë, pemët që lëkunden, njerëzit e frikësuar...etj. Punonjës të shumtë psiko-socialë, përfshirë këtu edhe ata të CRCA (Qendra për mbrojtjen e të drejtave të fëmijëve), kanë qenë pranë fëmijëve për t'i ndihmuar që ta kenë sa më të lehtë të kalojnë ankthin pas tërmetit dhe t'i kthehen sa më shpejt normalitetit. Nisur nga kjo, CRCA/ECPAT Shqipëri, ka vendosur që të hapë një ekspozitë me të gjitha punimet e fëmijëve që kanë humbur shtëpitë e tyre apo të fëmijëve që përjetuan tërmetin e asaj nate dhe tashmë i janë rikthyer jetës normale në shtëpitë e tyre. Ekspozita do të përfshijë foto, vizatime, piktura apo letra të fëmijëve dhe të ardhurat e saj do të shërbejnë për bamirësi në kuadër të tërmetit.