Të dhënat zyrtare nga Drejtoria e Tatimeve, flasin për një situatë alarmante në arkën e sigurimeve shoqërore, pasi ndërmarrjet shtetërore dhe entet publike nuk po paguajnë kontributet për sigurimet shoqërore për punonjësit. Deri në maj 2019 numërohen 1171 ndërmarrje dhe organe të administratës publike duke nisur nga Kuvendi, ministritë, tatimet, doganat, ujësjellësit, bashkitë, klube futbolli, qendra shëndetësore, zyra arsimore dhe shumë të tjera. Borxhi që këto ente publike u kanë punonjësve të tyre arriti në 13.8 miliardë lekë në fund të 2018 dhe u zgjerua me 19% në një vit. Përfundimi? Mijëra personave që punojnë në shtet u rrezikohen pensionet.