Lindje Perendim: A i duhet shpallur më në fund luftë karteleve meksikane të drogës?
10/11/2019 17:00

Terrori i karteleve meksikane të drogës vazhdon prej kohësh; nuk flitet vetëm për vrasje kundërshtarësh, aktivistësh, gazetarësh e madje edhe politikanësh. Bëhet fjalë për një strategji brutale që ka mbjellë frikën mes popullsisë duke i vendosur këto banda mbi shtetin dhe ndëshkueshmërinë. Aq i madh është niveli I dhunës së karteleve, sa njerëzit nuk dinë saktësisht as cfarë emri t`i venë: Terrorizëm? Rebelim? Apo të dyja bashkë? Një gjë është e sigurtë: në ka ndonjë përshkrim të saktë për dhunën në meksikë, ai është : ekstreme. Që kur qeveria meksikane shpalli ``Luftën kundër Drogës" në 2006, dhjetëra mijëra jetë kanë humbur në mbarë vendin prej sulmeve me armë të lehta, apo nga bombat e torturat. Shteti meksikan është përpjekur të merret me këtë fenomen, por për situatën kaotike, nuk ka ende një fund të qartë në horizont. Edhe pse fillimisht pati një rënie të niveleve të dhunës në Meksikë pas zgjedhjes së Presidentit Enrique Peña Nieto në 2012, 3 vitet e fundit sollën një tjetër rritje dramatike të saj. 23 mijë vrasje u numëruan në 2016-tën në të gjithë Meksikën, që do të thotë, më shumë vdekje se ato të regjistruara atë vit vit në Irak e Afganistan. Pavarësisht këtij realiteti, situata e përkeqësuar e sigurisë atje nuk ka marrë vecse një vëmendje të vakët nga mediat në Amerikën e Veriut dhe ato ndërkombëtare. Por kjo ndryshoi në 4 nëntor, pas asaj që do të mbahet mend si `` Masakra e Sonorës``.