Përplasja BE-UK për Brexit; Juncker: Do pendoheni. Reagon Farage
13/09/2017
Përplasja BE-UK për Brexit; Juncker: Do pendoheni. Reagon Farage
Britania e Madhe shumë shpejt do të pendohet që zgjodhi të braktisë Bashkimin Evropian, ka deklaruar presidenti i KE, Jean Claude Juncker.

Në fjalimin e mbajtur në Parlamentin Europian, Juncker tha se “Brexit” do të jetë një moment “i trishtueshëm dhe tragjik” për Unionin, por 27 vendet anëtare do të ecin përpara. “Brexit nuk është e ardhmja e Europës. Nuk është as ekzistenca, as fundi i tij”, tha Juncker.

Por, duke folur në të njëjtin debat, ish-lideri i UKIP Nigel Farage deklaroi se, “BE nuk ka mësuar asgjë nga “Brexit” dhe po lëron si një makinë me avull”.

Në fjalimin e tij në Strasburg, Juncker propozoi mbajtjen e një samiti të BE-së një ditë pas daljes së Mbretërisë së Bashkuar, më 30 mars 2019, në qytetin rumun Sibiu, për të caktuar të ardhmen e Bashkimit Europian.

Ai bëri thirrje për bashkëpunim ekonomik, reformimin e tregut të brendshëm, për më shumë mbështetje për shtetet jashtë Eurozonës në mënyrë që ato të përgatiten për të aderuar në përdorimin e monedhës së përbashkët, si dhe për më shumë koordinim në fushën e mbrojtjes.

Duke u ndalur pikërisht tek sfidat ekonomike dhe politike me të cilat kontinenti i vjetër është përballur në vitet e fundit, ai tha se, “era fryn në drejtimin e kundërt të lundrimit të Europës”.

Nga ana e tij Farage reagoi duke folur për “planet shqetësuese” të BE-së për të caktuar një president të vetëm të Unionit, një ministër Financash dhe një “ushtri të fuqishme në një Europë të militarizuar”.

“Ju nuk keni mësuar asgjë nga “Brexit”. Nëse ju do t’i kishit ofruar David Cameron konçesione, sidomos për emigracionin, më duhet të them se votimi për “Brexit” nuk do të kishte ndodhur kurrë”, tha Farage.

/ Top Channel


LAJME TE NGJASHME

MË TË LEXUARAT




Top Channel 2001 - 2016
Ndalohet riprodhimi i paautorizuar i përmbajtjes së kësaj faqeje.