“ISIS shqiptar”, padia në Kosovë: Nën urdhrat e Muhaxherit

14/06/2017

“ISIS shqiptar”, padia në Kosovë: Nën urdhrat e Muhaxherit
Prokuroria Speciale e Kosovës ngriti aktakuzë kundër 9 personave për terrorizëm. Sipas aktakuzës, 3 prej të pandehurve, me qëllim që të frikësojnë popullsinë, të destabilizojnë shtetet e Ballkanit e të krijojnë Shtetin Islamik, i janë përgjigjur thirrjes së pjesëtarit të organizatës terroriste ISIS, Lavdrim Muhaxheri, për akte terroriste.

Prokuroria Speciale e Kosovës njofton se, përmes kontakteve të rregullta mes tyre, me anë të internetit e konkretisht aplikacionit “Telegram”, njërit prej tyre i është bërë thirrje që ta kryejë sulmin terrorist kundër lojtarëve dhe tifozëve nga Izraeli, të cilët duhej të vinin në Shqipëri, në qytetin e Shkodrës, për të zhvilluar ndeshjen e futbollit mes Shqipërisë dhe Izraelit, më 12 nëntor 2016.

Dy të pandehur, gjatë muajit tetor 2016, sipas kërkesës së Lavdrim Muhaxherit, i cili nga Prokuroria konsiderohet si një ndër të pandehurit e me të cilin kanë pasur kontakte të vazhdueshme përmes “Telegramit”, kanë përgatitur sulme terroriste në Kosovë, atentatet kundër ndërkombëtarëve ose zyrtarëve të institucioneve të sigurisë.

Një prej tyre interesohej për blerjen e armëve automatike, që do t’ia dërgonte Lavdrim Muhaxherit, përmes njerëzve të tij ende të paidentifikuar, në këmbim të shumës 1.500 euro.

Plot 283.1 gramë eksploziv i improvizuar “triacetone triperoxide” (TAPT) i është gjetur njërit prej tyre në bodrumin e shtëpisë së tij. Po ashtu, Prokuroria ka gjetur prova për prodhim materialesh plasëse në shtëpi. Një prej të pandehurve, sipas Prokurorisë ka qene në Siri në vitin 2013.

/ Top Channel


LAJME TE NGJASHME

MË TË LEXUARAT




Top Channel 2001 - 2016
Ndalohet riprodhimi i paautorizuar i përmbajtjes së kësaj faqeje.