E-gjoba, policia thirrje: Verifikojini në internet
05/12/2013
E-gjoba, policia thirrje: Verifikojini në internet
Pagesat e gjobave të automjeteve tashmë do të mund të kryhen vetëm në postë dhe banka. Ky është urdhëri i lëshuar nga Drejtori i Përgjithshëm i Policisë, Artan Didi, ndërsa uniformat blu njoftojnë qytetarët edhe për shërbimin e verfikimit të këtyre gjobave nëpërmjet internetit.

Të gjithë të interesuarit mund të klikojnë në faqen zyrtare të Policisë së Shtetit në internet dhe në rubrikën “Shërbime për qytetarët” mund të kontrollojnë kundravajtjet rrugore. Linku në këtë pjesë të faqes të drejton automatikisht me sistemin elektronik të administrimit të gjobave të policisë rrugore.

Të gjithë drejtuesit e mjeteve që kanë gjoba të vendosura nga policia dhe që nuk i kanë paguar ato mund t’i verifikojnë ato online, ndërkohë që Policia Rrugore nxit qytetarët që të shlyejnë këto pagesa në posta dhe banka për të shmangur penalizimet e mëtejshme.

Urdhëri i Drejtorit të Përgjithshëm të Policisë së Shtetit për ndryshimin e rrugëve të pagesës së gjobave u lëshua disa ditë më parë dhe synon të thjeshtojë dhe shmangë radhët e gjata nëpër sportele për shlyerjen e tyre.

/ Top Channel


LAJME TE NGJASHME

MË TË LEXUARAT




Top Channel 2001 - 2016
Ndalohet riprodhimi i paautorizuar i përmbajtjes së kësaj faqeje.