Dështimi me FMN, Kosova rrezikon edhe 50 mln euro të BE-së

31/07/2017 00:00

Për shkak të mungesës së programeve të Fondi Monetar Ndërkombëtar, që vjen si pasojë e dështimit të marrëveshjes së re, Kosova rrezikon që të humbasë edhe 50 milionë euro nga Bashkimi Europian.

Zyra e Bashkimit Europian në Prishtinë përmes një përgjigje me shkrim i ka thënë Radios Europa e Lirë se performanca në kuadër të programit të FMN-së është me rëndësi qenësore në vlerësimin e BE-së për stabilitetin makro-fiskal në Kosovë.

“BE-ja, aktualisht është duke përgatitur dy programe nga Sektori Mbështetës për Buxhetit, për të përkrahur Reformën e Administratës Publike dhe Menaxhimin e Financave Publike në Kosovë, me një vlerë prej 50 milionë euro. Për të përfituar mbështetje nga Sektori për Buxheti i BE-së, një kriter i domosdoshëm është stabiliteti makro-fiskal”, thuhet në përgjigjen e zyrës së BE-së Kosovë.

Marrëveshjet me FMN-në e kanë ndihmuar Kosovës në vazhdimësi që të marrë kredi me kushte shumë të volitshme, si nga Banka Botërore dhe institucionet e tjera financiare ndërkombëtare, vlera e të cilave ka arritur në 400 milionë euro.

Ndërkohë, projektet që nuk do të arrijnë të adresohen, në rast të dështimit të marrëveshjes së Fondit Monetar Ndërkombëtar në përgjithësi kanë të bëjnë me përmirësimin dhe zhvillimin ekonomik të Kosovës.

Në kohën kur marrëveshja ishte nënshkruar, autoritetet e Kosovës patën deklaruar se këto mjete do të kenë fokus projektet në fushën e bujqësisë, në ujitjen e tokave, të infrastrukturës hekurudhore dhe projekte të tjera në arsim dhe shëndetësi.

Marrëveshja ekonomike, në vlerë prej 185 milionë euro mes Kosovës dhe FMN-së, e arritur në vitin 2015 me një kohëzgjatje prej 22 muaj, skadon në gusht të këtij viti. Autoritetet e Kosovës kanë deklaruar se nga kjo marrëveshje janë edhe 16 milionë euro që nuk mund të merren kredi, pa pasur rishikim të katërt të marrëveshjes, nga misioni i FMN-së. Por, rishikimi nuk është kryer ende nga mision i FMN-së për shkak të zgjedhjeve të parakohshme parlamentare dhe situatës politike të krijuar në vend.

Në Kosovë, më 11 qershor ishin mbajtur zgjedhjet e parakohshme parlamentare dhe deri më tani asnjë forcë politike nuk ka siguruar shumicën e nevojshme për formimin e qeverisë së re.

Seanca konstituive e Kuvendit të Kosovës është caktuar të mbahet më 3 gusht.

Top Channel