Guxon Greqia, rikthehet në tregjet e bonove
25/07/2017 00:00
Nesër ditë zie në Kosovë, Osmani: Në kujtim të të gjitha grave dhe vajzave të vrara 16/04 14:48
Në përpjekjen e parë të saj për t’u rikthyer në tregjet e bonove, pas tre vitesh e ndërkohë që kriza e saj e borxheve zbutet, Greqia të hënën ka ftuar zotëruesit e 4.75 për qind të bondeve të saj që maturohen në 2019, t’i këmbejnë ato me cash, bashkë me një plan për të ofruar një letër të re me vlerë me afat pesë vjecar.
Lëvizja është pritur me skepticizëm nga shumëkush, me disa analistë që mendojnë se mund të ketë qenë edhe e parakohëshme.
“Unë besoj se është një hap i mirë, por vetëm një hap. Besoj se duhet të shohim më thellë. Sigurisht është një hap në drejtimin e duhur. E ardhmja do të tregojë nëse ishte një lëvizje e mirë apo jo.Koha është pak e rrezikshme në këtë fazë, por rezultati do të flasë. Shpresojmë se është pjesë e një strategjie të plotë për rikthim në tregje”, tha analisti Nick Kafkas.
Hera e fundit që Greqia doli në tregun ndërkombëtar të bonove, ishte viti 2014, një vit para se kryeministri i sapozgjedhur Aleksis Tsipras të nënshkruante paketën e re të shpëtimit, të tretën për vendin që nga 2010-a, pas muajsh negociatash të tensionuara me BE dhe FMN.
Muajin e kaluar, Greqia përmbylli një rishikim të planit të shpëtimit, ndërsa huadhënësit e saj ofruan disa detaje mbi masat që duhen marrë, kur plani aktual të përfundojë në 2018, për të zbutur malin e borxheve që arrin në 180 për qind të GDP.
Ky zhvillim, krijoi paqartësi në tregjet greke dhe qeveria Tsipras tha se kjo do të shikohej si një test dhe do të konsiderohej pjesë e një strategjie të plotë për të garantuar që vendi të rikthehet plotësisht në tregje vitin e ardhshëm.
Top Channel
