Ronaldo: James duhet të qëndrojë. Nëse largohet…

James Rodriguez nuk ka luajtur rregullisht nën drejtimin e trajnerit Zinedine Zidane, ndërsa thashethemet e fundit e lidhin atë me një largim të sigurtë nga “Los Blancos” gjatë verës së këtij viti.

Manchester United dhe Interi janë dy skuadrat më të interesuara për shërbimet e kapitenit të Kolumbisë, por Ronaldo tha të enjten për “La Sexta” se, do të dëshironte që ish-lojtari i Monakos dhe Portos të qëndronte.

“James ka arsyet e tij për t’u larguar, e ne duhet ta respektojmë për çfarëdolloj vendimi”, tha Ronaldo përpara finales së Championsit, që Reali i tij do të zhvillojë ndaj Juventusit ditën e shtunë në Kardif.

“Nëse ai nuk ndihet më i lumtur dhe dëshiron më shumë, atëherë duhet të shohë për më të mirën e mundshme. Nëse do të donte mendimin tim, do t’i thoja që të qëndronte. Sigurisht që ai ka pretendimet e tij, kërkon të luajë më shumë, por këto janë çështje personale dhe unë nuk mund të ndërhyj. Ai ka potencialin e mjaftueshëm për të luajtur me Realin e Madridit, por nëse ka arsye për t’u larguar, ne do t’i respektojmë”, tha portugezi.

Top Channel