Lavdëroi lirinë e fjalës, kritika ndaj studentes kineze

23/05/2017 00:00

Një studente kineze u detyrua të kërkojë falje, pas reagimit të ashpër ndaj fjalimit të saj të diplomimit në SHBA, gjatë të cilit ajo lëvdoi ajrin e freskët të demokracisë.

Nga podiumi në Universitetin e Marylandit, Yang Shuping hoqi një paralele mes ndotjes së ajrit në Kinë dhe kufizimit të lirisë së fjalës në vend.

“Sapo mora frymë jashtë aeroportit, u ndieva e lirë. Por shumë shpejt do të ndieja një tjetër lloj ajri, për të cilin do të jem mirënjohëse përjetë. Ajrin e freskët të lirisë së fjalës. Demokracia dhe liria e fjalës nuk duhen marrë kurrë të mirëqena”, tha Yang Shuping.

Mjaftoi ky përshkrim i përvojës së saj në SHBA dhe përdoruesit e zemëruar të medieve sociale në Kinë u hodhën kundër saj, duke e akuzuar si një tradhtare që denigron atdheun. Shumë prej tyre i kërkuan Shupingut që të qëndrojë në SHBA.

Fjalimi i saj në “Youtube” u pa mbi 50 milionë herë dhe, veç qytetarëve të thjeshtë, edhe mediet kineze u vërsulën kundër Yang Shuping.

Madje autoritetet lokale në qytetin e saj Kunming thanë se, nuk e kuptojnë përse ajo ankohet, pasi ajri në qytet ka qenë i mirë thuasje çdo ditë këtë vit.

E zënë në befasi nga ky reagim i ashpër, Shuping nxitoi të kërkojë falje në mediet sociale kineze dhe tha se e kishte marrë mësimin. Por jo të gjithë kinezët u shprehën kundër saj. Një pjesë e komentuesve në rrjetet sociale thanë se kinezët, edhe kur shkojnë në SHBA, nuk mund të kenë liri fjale.

Top Channel